عرض مشاركة واحدة
  10  
♥̉ همسة غلآ ̉♥̉
عبد الرحمن فاق من غيبوبه السكر اول ما تطمن على حالة هند طلع من المستشفى قرر يروح لزياد بمكتبه طلع من المستشفى لشركة زياد


عند جاسم

في السرير فاقد الوعي دخل عليه نواف وشافه على حاله اتصل على فيصل وقاله يجي عند اخوه وطمنه على حاله



عند عبدالرحمن


وصل لشركة زياد ودخل لمكتب السكرتيره حاولت تمنعه عن الدخول ماعبرها وفتح الباب باكبر قوه عنده




عند زياد

جالس على مكتبه وكان عنده واحد يتناقشون بصفقه مشبوهه من الي متعود عليها فز لما سمع فتحت

الباب المفاجئة الا بدخلة عبد الرحمن مثل الاعصار قرب منه ومسكه بياقة ثوبه

زياد اشر لرجال يطلع وفهم عليه وطلع وسكر الباب

عبد الرحمن بثوران / يا لحقير لا تحسب الي سويته بهند بنسكت عنه

زياد مستغرب / وش سويت لهند

عبد الرحمن / لا تستغبي علي انت عارف اني كاشفك

زياد فك يد عبد الرحمن من ياقة ثوبه

زياد بجدية / ارتاح وقولي وش صاير لاني مدري عن شي

عبد الرحمن بغضب وصراخ / انت وكلابك تعرضتو لهند وصوبتوها والحين بالمستشفى والله لو صار لها شي مراح يقضي عليك الا انا

قبل لا يطلع عبد الرحمن تفل بوجه زياد

عبدالرحمن / تف عليك من رجال

زياد مارد على عبد الرحمن لانه بافكاره

زياد من الصدمه جلس على الكرسي عرف ان العصابه استبعدته عن العمليه ونفذوها من وراه هذا معناته انهم كاشفين حبه الوليد لها

طلع عبد الرحمن من مكتب زياد بعد ما برد كبده وزياد ما حس بخروجه

زياد متضايق ومهموم على الي صاير لهند ولا بيده شي يسويه علشان يحميها

قرر انه بيبلغ على العصابه بس تقوم ويطمن عليها بيفضى لهم لانه مراح يدمرهم الا هو لانه يملك اثباتات تكشفهم



في بيت ابو بسام

بعد ما خلصت ام بسام المكالمه ارتاحت والتفتت على زوجها الي واقف ينتظرها تخلص مكالمتها

ام بسام / الحمدلله نجحت عمليتها

ابو بسام بفرح / الحمد لله والشكر بكلم عبد الرحمن اتطمن عليه مسك جواله يتصل على عبد الرحمن



عند عبد الرحمن

كان بسيارته بطريقه للمستشفى سمع صوت جواله شاف رقم ابو بسام اش كثر كان محتاجه

عبدالرحمن \ هلا وغلا بالطيب كنت باتصل عليك

ابو بسام ارتاح صوته طبيعي

ابو بسام / الحمد لله على سلامة هند

عبدالرحمن / الله يسلمك توني طالع من مكتب زياد بردت كبدي فيه

ابو بسام بخوف / هذا مجرم روحتك مراح تفيد بشي زين ما ينتقم منك بعد

عبد الرحمن / يوم تطمنا وضنينا ان تهديدهم كلام نفذو تهديدهم كانهم يدرون اني مراقبها

ابو بسام بجديه / توقع منهم أي شي اذا في بالهم شي بيسونه الله يستر ويحفظ هند منهم

عبد الرحمن / اللهم امين لازم ادور لي حل يحميها منهم

ابو بسام / خلنا نفكر فيها مع بعض وينلقى الحل ان شاء الله

عبدالرحمن \ ان شاء الله خلاص بسكر وصلت للمستشفى

ابو بسام / أي مستشفى بنطمن عليها

عبدالرحمن / مستشفى ال.....



عند فيصل

اول ماسمع الي صار لاخوه ركض على طول للمستشفى وهو نازل من سيارته شاف غاده نازله من سيارتها تركض واضح من شكلها انها مصدومه لا شعوري لحقها لين شافها واقفه مع خالد قدام غرفة العمليات

نسى ليش جاي للمستشفى وصار يراقبها

غاده بخوف / امي وينها

خالد ونوره / ............

غاده تبكي / صحيح الي قالته ريتا

كلهم في انفسهم سبو عمران وريتا انهم خوفو غاده ما كان عندها احد يقويها استقبلت الصدمه بنفسها


خالد / ادعي لها يا غاده الحمد لله عمليتها نجحت وهي با لملاحظه وخلال 24 ساعه بيطمنونا عليها


غاده بصراخ فجر المستشفى / يمااااااااااااااه لا تموتين لا تتكريني لحاااااااااااااالي انا من غيرك اضيع يمه وعديتني انك ما تتركيني يمه من الي بعدك ابي انام بحضنك يمه لمين اشكي ومن تاخذ لي حقي من الي ياذيني يمااااااه دخيلك لا تموتين ما حسيت باليتم وانتي موجوده يمه انتي
ابوي الي ماشفته وانتي امي يماااااااااااه وطاحت مغمي عليها


فيصل بكى من قلب على حال حبيبته ولما اغمي عليها قرب من عندهم كان بيشيلها لكن صحى لما سمع صرخ خالد ينادي الممرضه فز وابتعد عنهم

شالها خالد بين ايدينه ودخلها غرفة الطوارئ بعد الفحوصات طلع فيها انهيار عصبي





عند فيصل

خاف على حبيته صار يدور بمكانه وده يلحق خالد ويسال عن حالها لكن غصب عنه مايقدر

جاه نواف / رحت لجاسم

فيصل / لا

نواف / اخوك اغمى عليه بغرفة العمليات لما شاف هند مصابه برصاصه


حاولنا نصحيه ماهو راضي شكلها صدمه نفسيه


دخل فيصل على جاسم الي فاقد الوعي وسحب كرسي وجلس عليه


بعد دقائق صحى جاسم وهو منهار / ماتت


فيصل بحزن / لا

تحرك جاسم من سريره بيشوفها بيتطمن عليها فك المغذي وراح لغرفتها تارك فيصل وراه


وصل لغرفتها كان عبد الرحمن موجود عند باب العنايه وهو يبكي ويلعن زياد مليون مره

قرب منه جاسم وهو يبكي منهار / عمي شلونها

التفت عليه عبد الرحمن وانصدم من شكل جاسم المنهار وتاكد انه يعشق هند حتى الجنون

كمل جاسم بحزن / ما قدرت اسوي العمليه لها اغمي علي توني صحيت

ركض له خالد كان بيضربه لكن ابوه منعه لانه رحم حال جاسم وان عشقه لها نساه الي سوته فيه نادر الحب الي يحبه جاسم لهند

عبدالرحمن بحزن / تحت رحمة الله

جاء نواف بيدخل يطمن على حالة هند
جاسم يراقب نواف بوجع وهو داخل غرفة هند كان نفسه يمنعه ما يبي احد يشوفها غيره لكن الظروف اقوى منه

دخل نواف بيكشف عليها انصدم من الملاك الي قدامه عمره ما تخيلها بالجمال الساحر يخلي الي قدامها يوقف مخبول

درس برا وشاف بنات من كل الاجناس لكن مثل هند ما شاف ولا راح يشوف تعوذ من ابليس لان الي قدامه فتنه من يطالعها تنسيه نفسه والي حوله

نواف في نفسه / اعوذ بالله من الشيطان الرجيم ما لومك يا جاسم متعذب كل ها لعذاب الله يكتبها من نصيبك

تطمن على حالتها وطلع من عندها لقى جاسم واقف عند الباب


جاسم بخوف / بشر نواف

نواف / الحمد لله بخير وبكره بننقلها لغرفه عاديه ومشى وتركهم

عبدالرحمن / وش صار على غاده

خالد / انهيار عصبي تطمن يبه الدكتور طمني عليها

عبد الرحمن بقهر / كله من زياد الكلب ان ما خليته يندم





في بيت بسام


اتصل ابو بسام بولده يقوله عن هند بسام تاثر كثير لان حبها للحين بقلبه لكن حاول يتماسك ما يبي يخون نجلاء وهي تحملته وصبرت على قسوته عليها

التفت بسام لنجلاء وهي تلاعب عيالها

بسام / نجلاء تروحين مع امي بتزور هند

نجلاء بخوف / وش فيها

بسام / حادث بسيط

نجلاء بطيبه / اكيد حبيبي بزورها هند بغلات اختي


بسام / اجل تجهزي بعد العصر انا بتطمن على خالد اكيد منهار وانتي زوريها



بيت ابو بسام


بعد ما سكر اتصاله مع ولده اخذ جواله واتصل على ابو نواف بيقوله عن الي صار بيوقفون مع عبد الرحمن بازمته





بيت ابو نواف


كان جالس بالصاله ام نواف والجوهره يتقهون دق جوال ابو نواف شاف المتصل ابو بسام


ابو نواف / هلا شخبارك

ابو بسام / اللهم لك الحمد نواف ماقالك عن هند

ابو نواف بستغراب / لا من الليل ماشفته طالبينه المسشفى

ابو بسام / هند بالمستشفى صار لها حادث بسيط

ابو نواف بصوت عالي / شلون صار الحادث وكيفها

ام نواف والجوهره مركزات بالمكالمه لما سمعن حادث وقفت قلوبهن من الخوف

ابو بسام / مدري انا واهلي بنزورها بعد العصر

ابو نواف / اكيد بنزورها اليوم

سكر مكالمته من ابو بسام وعلى طول سالته ام نواف

ام نواف / خير ان شاء الله الحادث لمن

ابو نواف / لهند بنت عبد الرحمن

الجوهره بكت / عمي شلونها

طالع فيها ورحمها / بخير يا بوك ترى الانفعالات ضاره لك

ام نواف / بزورها اكيد نوره تعبانه ومنهاره متعلقه كثير بهند واختها

الجوهره / عمي بروح معكم اكيد غاده منهاره




عند فيصل

لما طلع جاسم على طول طرت على باله فكره يتطمن فيها على غاده راح لمكتب اخوه خذ البالطو والسماعات ولبس كمامه بيطمن على غاده

وهو طالع الا على دخلت نواف شافه وانصدم

نواف مستغرب/ ليش لابس لبس اخوك

فيصل حزن / بشوفها بتطمن عليها

نواف بعصبية وصراخ / انت صاحي ولا مجنون اهلها عندها تبي تنذبح

فيصل بوجع / ما همني احد

نواف بعصبيه / من قال لك اني بسمح لك تسوي الجنون الي براسك

فيصل بصراخ / ماني منتظر سماحك قلت بشوفها بشوفها والي فيها فيها يكفيني وجع هالسنين تبيني اشوفها طايحه ولا اشوفها واتطمن عليها

نواف / وربي انكم مجانين واحد مغمي عليه والثاني بيتهور بتصرف مجنون اذا صار لك شي لا تجلس تندب حظك لاني حذرتك والي عقلة براسه يعرف خلاصه

من الغضب طلع نواف وترك وراه فيصل الي طلع من مكتب اخوه بطريقه لغرفة غاده









عند غاده

منسدحه على السرير وهي بعالم غير العالم وجنبها نوره تبكي قررت نوره تطلع تطمن على هند وبترجع لغاده


عند فيصل

شاف نوره طالعه من الغرفه وصل للغرفه بيدخل بيشوفها قبل لا يدخل عليه احد دخل الغرفه شافها صارت احلى من قبل قرب من سريرها مسك يدها وصار يكلمها


فيصل بحب وعشق / غاده يكثر شوقي لك للحين ما نسيتك وحبك يزود بقلبي كل يوم اكثر من اليوم الي قبله والله عشقي لك حتى الجنون ومد يده ومسح دمعتها
مسك يدها ورص عليها بقوه يبي يبرد قلبه بلمسه ليدها ما يبي يبتعد عنها

فيصل بحزن موجع / غاده اتمنى الله ياخذ من عمري ويعطيك ذبحني الحرمان تعبت وانا امثل اني قوي انا ضعيف

قطع عليه صوت غاده تهذي تنادي امها

غاده / يمه لا تموتين يمه لا تموتين



المستشفى بعد العصر


الكل تجمع عند غرفة هند يتطمنون عليها راحت الجوهره لمكتب نواف

طقت الباب سمح لها بدخول فرح لما شافها وستغرب من جيتها

نواف / هلا بجوهرتي

الجوهره بزعل / جوهرتك زعلانه منك

نواف بحب / ما عاش من يزعلها

الجوهره / بسم الله عليك ليش ماقلت لي عن هند

نواف / ما جاء لي وقت اقولكم واكيد ابوي بيزفني لاني ما قلت له

نواف / الجوهره ترى غاده مغمي عليها يمكن لا شافتك تتشافى

الجوهره بخوف / شنو وينها دخيلك ابي اشوفها وين غرفتها

نواف تذكر فيصل وخاف يورطه لشافته الجوهره طلب منها تجلس بمكتبه لين يطمن ان ماعندها احد من اهلها

طق الباب طلع له فيصل منهار وحالته تصعب على الكافر

نواف / الجوهره بتزور غاده ياليت تضف وجهك

طلع فيصل من عندها وطلع من المستشفى معاد يقوى على الوقف من الارهاق

نواف رجع للجوهره ووصلها لغرفة غاده

اول ما شافت صديقتها متمدده على السرير الابيض ولونها شاحب قربت منها وجلست على طرف السرير

الجوهره وهي تبكي / غدويه بلا دلع قومي هند تسال عنك

غاده /...........

الجوهره / علشان هند قومي وعلشاني انتي عارفه انك اختي وبنت عمي وصديقتي تبين تتركيني لحالي

فتحت غاده عيونها لما شافت الجوهره قدامها جلست تبكي وتشاهق

الجوهره تمسح دموعها وتقرب منها وتضمها

الجوهره بطمنها / والله هند بخير توني جايه من عندها الكل خايف عليك
غاده ارتاحت ان هند بخير


بعد اسبوع

هند تحسنت صحتها وطلعت لغرفه عاديه الكل زارها


غاده صحت وصارت ليل نهار عند هند وطلبت لها سرير جنبها وصارت تنام معها

جاسم تحسنت علاقته مع عبد الرحمن صارت تجيه رسائل تطلب منه يقتل هند بطريقه طبيه ما تنكشف بالمقابل يعطونه مبلغ كبير هو خايف ان الاغراء المادي يوصل لاحد الدكاتره وينفذ الي طلبوه منه

فيصل تدفقت مشاعره من جديد لما شاف غاده وصورتها في باله ليل ونهار





عند جاسم

طلع من مكتبه بطريقه لغرفة هند يبي يقابل عبد الرحمن لقى عبدالرحمن وخالد جالسين عند باب الغرفه

جاسم / السلام

عبد الرحمن / وعليكم السلام شلونك ياولدي

خالد لما شاف جاسم صد عنه

جاسم بجديه / عمي ابيك بموضوع مهم ياليت تجي معي لمكتبي

والتفت لخالد وكمل / وانت ياخالد ياليت تلحقنا الموضوع ما ينسكت عليه

عبد الرحمن وخالد لحقو جاسم لمكتبه دخلهم وقفل لباب بالمفتاح

عبدالرحمن بقلق / خير يولدي وش موضوعك ليش قفلت الباب

مد لهم الرسائل اخذها وقراها عبد الرحمن

انفجر عبد الرحمن / زياد الكلب والله لاوريه

جاسم بجدية / لازم ننقذها عندكم حل ولا اقول لكم حلي

عبدالرحمن بياس / لا والله يا ولدي ما لقيت حل قول الي عندك

جاسم متردد وخايف / العصابه ضامنه اني بتعاون معهم والحل اني وسكت

عبدالرحمن \ انك شنو

جاسم بخوف / اتزوجها بقصد حمايتها

خالد بسخريه / هههههههههههههه لاعبها صح يا جاسم وصلت بك الحقاره تالف كذبه وتصدقها وتبينا نصدقها هند بعيده عن شواربك

جاسم / والله والي رفع سابع سماء ان الرسائل تهديد حقيقيه واذا تزوجتها بتكون زوجتي على الورق

اقسم برب الكعبه اني ما لمسها وتصير اختي متزوجها بقصد حمايتها لاني بهربها لديره بتكون عند جداتي

تطمنو ماني مختلي فيها وبفهم العصابه اني نفذت طلبهم وقتلتها وانتم انشرو خبر وفاتها ويا ليت محد يدري من القريبين انها عايشه

وياليت تنقطع علاقتكم فيها اخاف يراقبونكم ويعرفون عن طريقكم انها للحين على قيد الحياء ويدورون وسيله ثانيه للانتقام

التفت لخالد وقال / للحين شاك بكلامي تبي مني ضمانات انا حاضر

خالد يطالع بجاسم الي واضح من كلامه انه صادق

خالد بخوف / هند مستحيل ترضى بالهروب ومستحيل توافق عليك

جاسم اوجعه قلبه بسبب نفورها وكرها له

جاسم باصرار / غصب عنها توافق وتهرب والزواج بترضى فيه لانه صوري


جاسم طلع قران صغير من درجه وحط يده داخله يحلف وهو ينزف من داخله

جاسم / احلف لكم على القران ان الزواج صوري ويحرم علي المسها كزوجه وبرجعها لكم مثل ما اخذتها بنت بنوت والله شاهد على كلامي

عبد الرحمن وخالد ارتاحو وقررو يوافقون لمصلحة هند

عبدالرحمن / كيف بنقنعها تسوي تحاليل الزواج

جاسم / ما قدور عليها بناخذ منها التحاليل بنفهمها ان التحاليل بنطمن على صحتها

عبدالرحمن بحزن / اول ما تطلع النتائج تتزوجها واحنا وثقنا في حلوفك خلك قدها

جاسم بوجع / وربي قدها بعد ما تتعافى تطلع من المستشفى لديره

عبدالرحمن / شلون بتقنعها تروح معك

جاسم بجدية / مراح اقول لها الا بديره تكون امام الامر الواقع وبخلي عمران يوصلنا ويبقى عندها لحتاجت شي وشغالتها ريتا بتكون عندها اخترتهم لانهم امينين وقريبين من هند

بمنع عمران يرجعها لرياض لو طلبت ويفهمها انه مايدل وجوالها اتركوه عندكم لاني مستحيل اخليها
تتصل على احد لين نتخلص من العصابه وانا وراهم ان شاء الله لين ينكشفون

عبد الرحمن اعجبه جاسم وتضحيته لهند وعرف انه حب صادق يعرف مخابر الرجال


طلعو من مكتب جاسم رجعو للبيت بيبدون بتنفيذ خطة جاسم وجاسم راح يسوي التحاليل وطلب من الممرضه تاخذ دم من هند





عند هند

جالسه هند على سريرها متملله من المستشفى قررت تطلع اليوم ما تقدر تصبر اكثر من كذا والشركه تحتاجها فيه صفقات كبيره تخاف تضيع عليها وهي جالسه بالمستشفى

ضغطت الجرس الي بجنب سريرها دخلت عليها الممرضه

هند / نادي الدكتور المشرف على حالتي

طلعت الممرضه لمكتب نواف تناديه وتقول ان هند تبيه

طلع نواف من مكتبه رايح غرفة هند


عند هند

كانت واقفه عند شباك المستشفى دخل نواف ما نتبهت لدخوله اول مادخل تفاجئ من شعرها وانبهر

نواف ذكر ربه في نفسه خاف من عينه تصيبها


نواف بجدية / الممرضه تقول انك طلبتيني

هند سمعت الصوت والتفتت على نواف ونصدمت بوجوده

نواف بعالم ثاني يوم التفتت وشاف وجهها غصب عنه ما قدر يغض نظره

هند منحرجه انه يشوفها كذا بدون عبايه ونقاب

هند بعصبية / المفروض من الذوق اطق الباب علشان نتستر

نواف صحى على نفسه ونزل عيونه للارض مستحى من الي سواه

نواف منحرج / طقيت الباب لكن ما سمعت رد واضطريت ادخل

مشت قدامه متجه لدولاب طلعت عبايتها وشيلتها ونقابها ولبستهم

حاول قد ما يقدر يغض بصره لكن عيونه تخونه الا يطالع فيها ابهرته وضيعت العقل براسه

نواف بسبب التوتر الي فيه والضغط الي فيه حس بحراره بجسمه ولعن نفسه مليون مره انه باشر حالتها

نواف في نفسه / وش فيك يا نواف احترم صديقك الي يعشقها انت بنظراتك تخونه وتخون زوجتك

سبحان من خلقها اذا انا الرجال المتزوج ضاعت علومي يوم شفتها شلون العزابي زين صرت دكتورها هذي خطر على دكاترة المستشفى مستحيل بتسلم منهم هذي فتنه متحركه ما لومك يا جاسم يوم عشقتها ونذرت نفسك لها

من يصدق الي قدامي تملك كل القوه والجبروت والقسوه والسيطره والظلم وحب الانتقام

هند قطعت عليه افكاره / دكتور اكتب لي خروج اليوم ما قدر ابقى اكثر من كذا

نواف بحده / اسف مراح اكتب لك خروج لين تتحسن حالتك

هند بقوه / ماني منتظر منك تسمح الي اقوله بتنفذه وانا ادرى منك بصحتي ما يحتاج احد يذكرني فيها ودقيقه وحده مراح ابقى

نواف بقوه اكبر من قوتها / انتي بمستشفاي منتي بشركتك تلقين الاوامر وتنتظرين التنفيذ
انا الي امر وانتي تنفذين

هند بعصبية / انا بطلع اشوف شلون بتمنعني

طلع نواف من غرفتها من غير ما ينتظرها تكمل كلامها طلع برا الغرفه قابله جاسم

جاسم / شلونها

نواف بعصبيه / عليها تصرفات تنرفز تخيل تبي تطلع من المستشفى غصب عني

جاسم / شلون

نواف / قاله كل الي صار


جاسم بابتسامه كلها الم / وتلومني في حبها ولا يهمك كلامك الي بيمشي وبطريقتي

تركه جاسم ودخل غرفته ونادى الممرضه وعطاها ابره منومه وامرها تعطيها لهند

جاسم في نفسه \ هانت يا جاسم كلها كم يوم وتصير زوجتك ملكك هههههههه قصدك اختك ومحرمه عليك

ياعذابك وحرمانك يا جاسم بتصير قدام عيونك وبين ايديك وبنفس الوقت بعيده شلون بقدر اقاوم رغبتي فيها وهي ملكي حلالي





يتبع



عندنواف

رجع نواف لبيته كانت الجوهره باستقباله باسها

نواف / جوهرتي شخبارك وخبار ولدنا

الجوهره / طيبه لكن ولدك شكله بيصير لاعب كورهمحترف

نواف / هههههه ليه

الجوهره / جنني بحركاتها

__________________


اضحك مع الناس واخفي همً قتلني*.*
همٍ بوسط العين بين ومفضــــــــــــوح
اخفي دموعي بأبتسامه وكــــــــني *.*
كني سعيد بدنيتي بضحك ومـــــــــــزوح

وانا اللي فيني هم وحزنٍ سكـــــني *.*
لو سكن غيري من القهر مات مذبــــوح


[flash=http://www.jewelsf.com/up/uploads/0fac216a0c.swf]WIDTH=500 HEIGHT=200[/flash]